21 лютага 2019 года у чацвер 19.00 у Брэсце
Спектакль «Біблія князя Радзівіла» прысвечаны Мікалаю Радзівілу Чорнаму (1515 — 1565), — аднаму з самых вядомых гістарычных дзеячаў Беларусі ХVI ст. Мікалай Радзівіл Чорны быў адным з галоўных лідараў руху Рэфармацыі, займаў найвышэйшую дзяржаўную пасаду канцлера Вялікага Княства Літоўскага. Ён заснаваў першую на тэрыторыі сучаснай Беларусі друкарню ў Брэсце (1553 г.), у 1563 г. — надрукаваў славутую Берасцейскую Біблію. Як фактычны кіраўнік ВКЛ, Мікалай Радзівіл Чорны спрычыніўся да адной з самых удалых эканамічных рэформаў у нашай гісторыі — Валочнай памеры (1557 г.), а таксама да падрыхтоўкі другой рэдакцыі Статута ВКЛ (1566 г.). Імя Мікалая Радзівіла Чорнага ўнесена ў падручнікі па гісторыі нашай краіны.
Дзеянне спектакля ахоплівае 2 гады — з 1551 па 1553 г. П`еса прысвечана складанаму выбару ў жыцці канцлера. У выніку, ён цверда вырашае ісці па шляху служэння Богу і Айчыне.
Спектакль падрыхтаваны творчым калектывам пад кіраўніцтвам лаўрэата Нацыянальнай тэатральнай прэміі Беларусі, актора і рэжысера Нацыянальнага акадэмічнага тэатра імя Янкі Купалы Паўла Харланчука-Южакова. Аўтар сцэнара — кандыдат гістарычных навук, загадчык аддзела гісторыі беларускай дзяржаўнасці Інстытута гісторыі НАН Беларусі А.У.Унучак.
Кошт квіткоў ад 8 да 10 руб.
